港聞

港聞二

【Emily】國產新輕鐵 明610線751線啟用

【明報專訊】輕鐵係「屯元天」居民出行嘅主要公共交通工具之一,唔少輕鐵列車都陪伴區內居民成長,嚟緊即將有新輕鐵列車投入服務。港鐵噚日宣布,最新一代「第五期」輕鐵會喺聽日(17日)開始陸續行駛,其中首兩部新輕鐵已通過營運同安全測試,並得到機電工程署批准,將會以拖卡形式投入服務,初期行駛來往元朗至屯門碼頭嘅610線,同埋來往天逸至友愛嘅751線。

另一部新輕鐵亦進入測試階段,港鐵特別喺呢部新輕鐵嘅車頂安裝太陽能發電板,希望利用可再生能源為車廂照明系統提供動力,為輕鐵服務注入環保元素。

調整扶手吊環分佈 座位增加

根據港鐵資料,港鐵喺2016年斥資7.45億元,向中國嘅「中車南京浦鎮車輛有限公司」購入40部新輕鐵,30部係用作更換現有「第二期」輕鐵,其餘10部則用作擴充車隊。其中「第五期」輕鐵嘅車身以綠色、紫色及白色配搭為主,用上流線形線條設計;車廂採用經改良嘅LED照明系統,增加空間感,仲調整咗扶手同吊環嘅分佈,座位亦較「第二期」輕鐵增加。

港鐵話,手機應用程式MTR Mobile嘅「Next Train」功能已覆蓋輕鐵網絡,乘客可查詢各輕鐵車站月台最多5條輕鐵路線嘅實時預計到站時間資訊。

上 / 下一篇新聞