港聞

港聞二

【Emily】疫情不明個案 葉劉話源自非法行為

【明報專訊】現時本港新冠病毒疫情時有源頭不明個案,行會成員、新民黨主席葉劉淑儀喺訪談節目話,近日香港先後有泰國人、內地逾期居留者等感染,佢相信源頭不明個案一定係做非法行為,舉例從事非法酒吧、按摩、賭場等行業。葉太話香港個案好難「零清(清零)」,內地亦認為香港疫情高危,所以短期內都難啲返大陸旅行。

葉太接受建制群組「Save HK」負責人Adrian Ho訪問,仲特意著咗花裙,笑言「希望唔好畀人笑我咁大年紀著花裙仔啦」。葉太解釋,佢最近幫襯時裝店,店方建議佢開戶口同充值1萬元,就可以當1.1萬元消費,亦有折扣、可以做VIP;佢覺得零售業過去幾個月好慘,就開咗個戶口、買咗幾條花裙,「雖然我年紀都唔輕,但(款式)都幾啱我」。

近期多行山:醫生話血壓「18歲」

葉太又分享健康之道,自言近期周末好鍾意行山,因為行得山多,早前去量血壓時,醫生話佢嘅血壓係18歲年輕人嘅數字,血液仲要氧分十足。葉太又透露媽媽、阿姨都曾患上結腸癌,所以雖然佢鍾意食肥豬肉,但都唔敢食,早餐會食穀物加乳酪、水果等,仲會每年照腸鏡。

相關字詞﹕新型冠狀病毒肺炎 零售業 消費 行山 葉劉淑儀

上 / 下一篇新聞