港聞

港聞二

【Emily】促銷擾人 黃定光:煲呔北京述職收電話

【明報專訊】立法會財委會噚日討論商務及經濟發展局嘅保留編外職位建議,即係保留個官員執行工作,呢個職位有份制訂立法建議規管人對人促銷,唔少議員發言時講到自己收到促銷電話嘅經驗,民建聯黃定光仲好清醒,話政府講咗幾十年仲係建議緊,提到前特首曾蔭權喺北京匯報工作嗰陣,電話竟然響起,都係人對人促銷嘅來電。

佢嘅黨友鄭泳舜都話,人對人促銷唔係咩新課題,但講咗幾年大家都麻木埋,形容「根本就無得攔(促銷電話)」,話自己都有好痛苦嘅經驗。佢話收到啲人對人促銷電話,佢打到去對方總公司叫唔好再打嚟,點知「一個禮拜冇打嚟之後,第二個禮拜又打嚟」,佢之後直程要出封信叫對方唔好再打,但「佢都仍然再打嚟」,對好多市民都好滋擾。佢話𠵱家甚至唔係人對人,因為有時打開電話會發現自己被加入通訊群組,入面有成300幾個人,成件事已經進化咗。

體育、演藝、文化及出版界議員馬逢國就做咗個統計,睇咗自己電話,發現促銷電話佔佢話音通訊四成,令佢好困擾喎。

相關字詞﹕曾蔭權 商務及經濟發展局 黃定光 人對人促銷電話 鄭泳舜

上 / 下一篇新聞