港聞

港聞二

【Emily】話民政阻研究 區議員搵申訴署投訴

【明報專訊】中西區區議員葉錦龍噚日喺fb話,當區區議會批准咗8個研究項目,但畀民政事務總署以行政手段抽起,包括保育中環郵政總局研究項目、改建連接堅尼地城新海旁臨海地段為臨時休憩用地等。葉錦龍引述中西區民政處喺噚日該區召開嘅一個委員會會議上話,正與民政總署溝通同審視文件,但當佢問到審視文件一般需時幾耐,民政專員只一味敷衍話仲溝通緊。葉錦龍提出向申訴專員公署投訴民政總署行政失當,動議獲通過。

包括保育中環郵政總局研究等

中西區區議員梁晃維(Fergus)同Emily講,本身都就區內一啲古蹟保育提出撥款申請做研究,將執行方面交由民政事務處做,等處方出招標文件,點知平時幾日就做完嘅程序,過咗幾星期至一個月都未見,再問民政專員,對方先話係總署要時間審查,但審查幾耐就無可奉告。佢覺得使用區議會撥款係議員權利,總署無權阻止,所以就有呢個動議。

Fergus話,其中有個研究係有關中環郵政總局,因為放咗入賣地表,如果賣出就會拆,本身想做研究睇吓郵政總局歷史價值,會唔會可以被保育,質疑研究可能同政府賣地有衝突而被阻撓。

上 / 下一篇新聞