港聞

港聞二

【Emily】周浩鼎眼中 人權組織 播毒高危過官?

【明報專訊】喺《公民權利和政治權利國際公約》之下,香港政府要定期向聯合國交報告,本身下周一嘅立法會政制事務委員會就呢件事搞公聽會,點知委員會主席周浩鼎噚日決定因應疫情唔搞,但政府官員會照出席,唔通議員同官員就唔怕傳播病毒,關注人權嘅組織風險就高啲?

取消權利公約公聽會

官員照出席會議

工聯會同民建聯本周二去信周浩鼎,提到疫情有上升趨勢,建議取消公聽會。周浩鼎噚日話,收到信件考慮後,都覺得為咗健康安全,改由組織書面表達;又話官員都會在席回答委員提問。佢強調不存在政治考慮,叫大家唔好抹黑。

周:不存在政治考慮

人權組織就好不滿,國際特赦組織話,公聽會係社會團體公開向官員表達意見嘅場合,取消係剝奪港人參與公共事務權利。民權觀察質疑周浩鼎藉疫情迴避公民社會質詢,而立法會同日亦有其他會開放畀公眾旁聽。睇番政制事務委員會,唔計辭任民主派議員都有20幾人,計埋官應有接近30人。

上 / 下一篇新聞