港聞

港聞二

【Emily】陸頌雄遭投訴無邀國泰工會 私藏工會信

【明報專訊】國泰航空裁員兼要求員工簽新合約條款,留任機師和機艙服務員最遲上周三(4日)限期前已簽約,但立法會人力事務委員會及經濟發展事務委員會噚日先開聯席會議,會議主席兼勞工界議員工聯會陸頌雄(圖)被民主派議員「投訴」,話佢唔邀請工會代表,又將工會寫畀委員會封信「當自己私人財產」。

被問無邀工會代表 稱商政策非個案

噚日一開會,民主黨林卓廷問陸頌雄有無請工會代表,陸頌雄解釋會議主要討論政策,唔係事件或個案,所以邀請政府部門出席,政府部門再邀請國泰出席。公民黨譚文豪質疑,國泰工會寫信畀委員會,點解無畀出席議員,陸頌雄堅持封信係「寫畀我嘅」,「如果大家好想要,我唔介意分享畀大家」。

工黨張超雄發言時再質疑陸頌雄,喺國泰員工簽新合約嘅死線過晒先肯開會,又將工會封信當自己私人財產。陸頌雄就反駁,自稱已盡最大努力,爭取最快時間開會,「希望你唔好揣測我」。政府噚日只派出運房局副秘書長同勞工處副處長出席,社福界邵家臻質疑政府視今次議題係「副題」。

相關字詞﹕立法會 國泰航空 陸頌雄

上 / 下一篇新聞