港聞

港聞二

【Emily】5分鐘提名完 陳健波任IT委會副主席 主持何君堯讚very good

【明報專訊】立法會資訊科技及廣播事務委員會噚日選舉副主席,開會後5分鐘內完成提名程序,主持選舉嘅委員會主席何君堯忍唔住大讚「very good(非常好),多謝大家通力合作」,最後保險界議員陳健波(波哥)以18票比8票當選副主席,擊敗資訊科技界議員莫乃光。選舉後何君堯仲邀請波哥上主席台坐,波哥就以手勢婉拒。

何君堯喺會上話,政府建議將電腦化計劃嘅項目,同發展事務委員會進行聯席會議一齊傾,莫乃光話過去未試過,擔心業界有異議。何君堯就叫莫乃光開導吓業界,兩人發言時候多次疊聲,最後何君堯話「你聽埋我講先好冇呀?唔好我講一句、你駁一句」。

黃國健任民政委會副主席

民政事務委員會噚日都選舉副主席,工聯會黃國健接受提名時話,要跟民建聯梁志祥「學嘢」;最後黃國健擊敗民主黨鄺俊宇當選副主席。

相關字詞﹕民政事務委員會 立法會 資訊科技及廣播事務委員會

上 / 下一篇新聞