港聞

港聞二

【Emily】不敵疫情 中大NA Can結業 經營廿多年 老鬼懷念「名物」紅豆冰

【明報專訊】中大人又將再失去一個集體回憶。中文大學新亞書院學生餐廳(NA Can)因為疫情而令生意大受打擊,已決定結束營運。消息噚日喺facebook專頁「CUHK Secrets」傳出後,唔少老鬼學生紛紛大呼不捨,大讚NA Can「名物」紅豆冰同芝士火腿卷好好食。

做到11·27 負責人:將退休

Emily噚日問過NA Can承辦商生利集團嘅負責人鄧先生,佢話由上年11月捱到𠵱家,捱足成年,尤其疫情下學校癱瘓晒,無辦法再做落去。佢話,餐廳做到11月27日,就會結束20幾年的營運,自己都年紀大,做嘢無以前咁有魄力,NA Can結束後佢都會退休。

有中大畢業生話以前讀書嗰陣,成日去NA Can飲幾蚊一杯嘅紅豆冰,落堂後又同同學去嗰度食tea醫肚,一聽到餐廳結束營業都好唔捨得,諗住遲啲搵埋朋友返中大,去NA Can食多次下午茶。

中大就話,新亞書院曾作出各項特別安排,例如減免部分管理費,不過長期入不敷支下,經營者都係決定結業,之後展開招標程序,盡快物色合適嘅服務承辦商接手經營。

相關字詞﹕新亞書院 中大

上 / 下一篇新聞