港聞

港聞二

【Emily】林鄭話最鍾意睇黃偉綸網誌

【明報專訊】多名司局長每逢周日就會化身鍵盤戰士寫網誌,特首林鄭月娥噚日喺facebook點名大讚發展局長黃偉綸(圖),話最鍾意睇佢嘅網誌,因為「有聲有片」,又會安排負責嘅同事講解,內容亦令曾經做過5年發展局長嘅林太特別有親切感。黃偉綸噚日嘅網誌講「大埔濾水廠擴建工程」,林太話工程係佢做局長時規劃嘅,感謝水務署合力完成。其實勞工及福利局長羅致光噚日亦有發表網誌,講有關安老服務行業,不過就無片睇喇。

羅致光話今個月內社署會有一連串宣傳工作,包括喺多份報紙登廣告,希望可以吸引大眾加入照顧行業,服務安老院同殘疾人士院舍。乜嘢人適合做呢一行?羅致光話「三心兩意」嘅人都適合,即係有關心、愛心同耐心咁照顧他人,同時又鍾意、樂意去幫助別人。

羅致光:「三心兩意」適合服務院舍

羅致光話社署自2015年起推出「青年護理服務啓航計劃」,目標係為有志喺社福界護理工作發展嘅青年安排聘用、培訓;羅致光形容護理行業「求才若渴」,鼓勵17至29歲青少年如有興趣參與計劃,可以直接同5間營辦機構聯絡。

相關字詞﹕羅致光 林鄭月娥 黃偉綸

上 / 下一篇新聞