港聞

港聞二

【Emily】做人口普查員 財爺中四遇劏死牛

【明報專訊】政府明年會做大型人口普查,財政司長陳茂波噚日喺網誌同facebook上載短片,講近日到訪政府統計處總部。佢喺片中話自己同統計處都有淵源,原來佢喺1971年嘅中四暑假兼職做過人口普查統計員,當年財爺仲好勇敢,自告奮勇陪女同事到一啲人流比較雜嘅地方做訪問。點知到真係做訪問時,財爺就畀人「劏死牛」用武器指嚇,「所以好瘀呀,記到𠵱家」;一旁嘅統計處職員回應話「哎呀……司長你真係唔好彩喇」,補充統計員自2016年起全面「行孖咇」,以策安全。

試做電話訪問 職員:表現算唔錯

財爺話明年嘅人口普查將會面對新冠病毒疫情帶嚟嘅不明朗因素,統計處會加強用資訊科技蒐集數據。考慮到市民唔同需要,政府仍要招聘核查員,親身上門同住戶面談訪問。財爺話統計處會為前線人口普查員提供培訓同防護裝備。

探訪片段中,財爺即場試做電話訪問訓練,模擬面對受訪者刁難。完成訓練後,財爺問自己表現及唔及格,職員話已經算唔錯,但字幕就寫住「乜咁客氣呀」、「一睇就知唔合格啦」。

相關字詞﹕人口普查 政府統計處 陳茂波

上 / 下一篇新聞