港聞

港聞二

【Emily】林鄭訪京行 中央官員笑談美國大選

【明報專訊】美國大選全球熱議,唔止香港政壇議論紛紛,遠在北京嘅內地官員都講埋一份。中共中央政治局常委、國務院副總理韓正噚日喺北京接見特首林鄭月娥,喺林太現身前、記者已入內準備之時,韓正同港澳辦主任夏寶龍、副主任張曉明等官員寒暄,有人話美國總統特朗普應該忙緊大選,又有人問點解大選仲未有結果、下星期應該有結果,有官員就回應話特朗普可能要打官司。談論間不時傳出笑聲,呢一幕畀記者影低晒。

林鄭話冇傾:較關心融入國家發展

林鄭月娥隨後喺北京見記者總結訪京之行,有記者問佢有無同領導人談論美國大選,又問佢大選對香港將來嘅影響,佢就話無同領導人討論美國大選,「我哋比較關心自己香港融入國家發展嘅工作」。

林太回應英文提問時話唔想捲入美國政治,但無論邊個當選總統,佢都認為每個國家、政府都應該尊重其他地區嘅管轄權,批評過去一年美國政府多次干預中國、香港內政。佢形容港美關係過往緊密同堅實,希望呢種關係可以延續。

相關字詞﹕林鄭月娥 韓正 美國總統選舉

上 / 下一篇新聞