港聞

港聞二

【Emily】做禁電子煙委會主席 象哥認係煙民

【明報專訊】政府研究禁售電子煙等另類煙草產品嘅法案委員會噚日開會,民建聯黃定光(象哥)、衛生服務界李國麟(Joe)先競逐主席之位。公民黨郭家麒喺會上要求兩人事先申報利益,聲明係咪煙民,當時主持選舉嘅自由黨張宇人就話,今次嘅條例同禁煙無關,兩名候選人申報與否可自行決定。最終象哥以20票對10票擊敗Joe,當選主席,而象哥之後主動回應郭家麒嘅要求,表明自己係吸煙者,但就從來無吸電子煙或加熱煙。

稱從沒吸電子煙加熱煙

呢個法案委員會喺上個立法年度已中止工作,委員會要討論係咪重新審議法案,抑或繼續上年進度。自由黨邵家輝話,今年有新嘅委員加入,佢哋可能無聽過以前嘅討論內容,基於程序公義,應該重新審議整條草案。委員會前主席、工聯會郭偉强就話,如果要重新舉辦公聽會,對委員會而言比較吃力,大費周章,再者上個立法年度剛過去無耐,佢建議唔好從頭再來,希望能喺本會期內完成審議。最終委員會未達成共識,下次開會再傾過。

相關字詞﹕法案委員會 黃定光 禁售電子煙

上 / 下一篇新聞