港聞

港聞二

【Emily】陳克勤請黨友食小籠包 真肉素肉難分

【明報專訊】民建聯立法會議員陳克勤搵咗9個黨友做測試,請佢哋試食小籠包,睇吓分唔分得出真豬肉同素肉(植物肉),結果黃定光(象哥)同鄭泳舜都估錯。象哥未試食前牙擦擦咁話「未食都睇得出」,成個食家咁試食素肉小籠包,形容「纖維粗咗啲,肉味冇咁香」;食真豬肉小籠包嗰陣就話「有啲水準、感覺唔錯」,但最係佢都係揀錯咗。佢聽到自己估錯,頓時「吓」一聲,收到安慰獎充電線,笑言「即係我黐咗線」。

陳克勤搵小籠包師傅分別整咗兩款小籠包畀黨友試分辨真肉素肉。其他民記議員未試食之前,單憑小籠包外表分析,蔣麗芸認為真肉有色啲、有汁;周浩鼎睇得出豬肉小籠包滲油比較多。至於食素肉落口,何俊賢認為一樣有肉嘅質感,而陳恒鑌形容「有噍口」。主席李慧琼一食就分得出,仲撩開啲肉嚟睇清楚。

試食完畢,9個民記議員有7個分得出素肉同真豬肉。陳克勤話,啲人覺得素肉同真肉小籠包無大分別,又話為咗地球、環保可以選擇素肉食品,好多人以為素肉係加咗人工添加劑,但佢話都可以係無添加嘅全天然素肉、植物肉。

佢呼籲大家「少肉多菜」救地球,食少啲豬牛。

相關字詞﹕素食 民建聯 陳克勤

上 / 下一篇新聞