港聞

港聞二

【Emily】政團民望評分 人民力量首稱冠

【明報專訊】香港民意研究所噚日發表立法會議員同政治團體民望嘅民調結果,喺政治團體民望方面,人民力量擊敗民主黨、民建聯等政黨,以42.9分首次奪得第一位。人民力量近月亦多事發生,包括主席陳志全決定唔延任立法會議員,副主席譚得志被捕不獲保釋。至於立法會議員民望方面,民主黨鄺俊宇以57.3分得第一,其餘民調內嘅議員得分都低於50分。

議員民望鄺俊宇最高

香港民研喺上月19至22日,分階段以電話訪問分別504人及510人,調查佢哋對於立法會議員同政治團體嘅評分。喺10個政團中,人民力量嘅民望排榜首,民主黨、社民連、公民黨依次排第二至四位;至於建制派方面,自由黨、新民黨、民建聯同工聯會分別排第七至十位。

立法會議員民望方面,香港民研先調查5名最多人認識嘅議員,再請市民評分。議員支持度依次為鄺俊宇、民主黨涂謹申、香港本土毛孟靜、民建聯李慧琼、經民聯梁美芬,其中梁美芬得分25.9,係佢喺2017年首次被評分以來新低。

相關字詞﹕人民力量 立法會議員 香港民研

上 / 下一篇新聞