港聞

港聞二

【Emily】趙家賢被咬甩耳一年 傷處受感染

【明報專訊】東區區議會副主席、民主黨趙家賢去年11月3日晚上,阻止一名中年漢持刀襲擊市民時被對方咬甩左耳。噚日係事發一年,佢喺facebook講康復進度,話不幸地傷處受感染,要食抗生素。佢受傷後長期要喺左耳蓋上紗布,以免雙耳接收聲音量不對等、喺嘈雜環境下頭暈。

東區醫院助3D打印人造耳

趙家賢透露,東區醫院矯形義肢部用電腦掃描及3D打印技術為佢整咗人造耳廓測試版,佢好期待可成功做出毋須鑽頭骨、以剩餘耳廓套入方式嘅人造耳廓,盡快免去紗布掩耳之苦。趙博士話,雖然左耳廓四分之一剩餘部分嘅傷口已癒合,但該斷裂位置嘅神經線受創,經常出現陣痛,呢兩個星期耳珠同斷裂位置嘅接駁位受粉瘤感染,有血水滲出及紅腫痛楚,須服抗生素同塗藥膏。

原本東區醫院耳鼻喉專科建議計劃嘅人造耳廓治療方案,係喺佢左耳背後割開掀起頭皮,喺頭骨鑽3個小圓洞以安裝螺絲帽,仲要確認螺絲帽同頭骨、頭皮無排斥後,先鑲入磁石螺絲,而3D打印嘅人造耳廓都要裝磁石,以接合兩者。不過佢話家人及家庭醫生有保留,擔心實際上帶來二次創傷,所以就有剩餘耳廓套入方式嘅人造耳廓方法。

相關字詞﹕區議會選舉 反修例運動 東區區議會 趙家賢

上 / 下一篇新聞