港聞

港聞二

【Emily】趕認購熱潮 容海恩陳振英抽「螞蟻」

【明報專訊】新股螞蟻集團(新上市編號︰06688)喺香港集資,全城瘋狂認購,連議員都唔執輸,新民黨容海恩(Eunice)前日趁熱潮,請金融服務界議員張華峰(肥老闆)喺facebook拍短片講股市,請教點分配資源、抽iBond定「螞蟻」好。肥老闆就話兩樣投資都唔錯,螞蟻就投機性,喺疫下為香港市民帶嚟歡樂,佢對螞蟻股價上升期望好大;iBond就長遠啲、實在啲。Eunice透露自己拎咗少少錢買iBond,又拎咗少少錢去抽螞蟻。

肥老闆話,螞蟻令證券行生意多咗,抽新股非常踴躍,申請人數料創新高。佢仲數螞蟻三大好處:喺香港集資量全球最大;管理層全部係科技精英;好多子公司都有業績交代。佢話唔怪得咁多人鍾意螞蟻,對香港金融中心提升好有幫助。Emily問肥老闆有冇抽螞蟻,佢笑笑口唔講,至於有冇「頂頭槌飛」(認購新股數目上限),肥老闆就話唔頂頭槌,因為金額好大。

金融界議員陳振英都有抽,抽幾多就保持秘密,佢話啲人借孖展抽螞蟻嘅申請都破晒紀錄,佢就呼籲大家唔好借錢嚟認購,應該用實錢。

相關字詞﹕金融服務界 張華峰 容海恩 螞蟻集團

上 / 下一篇新聞