港聞

港聞二

【Emily】民研:近七成人反對港人內地投票 曾國衞質疑唔理講普通話市民意見

【明報專訊】香港民意研究所前日發表民調,話有68%受訪市民反對「港人在內地投票」建議;政制及內地事務局長曾國衞噚日到立法會回應議員質詢,佢話民調有前設,包括要求受訪對象年滿18歲,以及係講粵語嘅香港居民,「我唔太明白,點解佢有呢個前設嘅要求?係咪講普通話或英文嘅香港居民,佢哋嘅意見,(民研)就唔會進行訪問,唔去聽取佢哋嘅意見呢?」

估算33萬成年永久居民常留粵

至於選民登記資格嘅要求,曾國衞話政府未有計劃更改,而根據政府估算,截至去年中,通常逗留喺廣東省嘅18歲或以上嘅香港永久居民約有33萬人。佢又話,任何人無論喺香港或境外作出選舉舞弊均屬違法,廉政公署會視乎案件實際情况,採取執法行動,包括搜查同拘捕。

民主黨林卓廷就質疑,點解政府唔就港人內地投票做公衆諮詢,認為計劃係建制派同政府合謀「公然種票」。阿廷指廉署無跨境執法同調查嘅權力,「係咪期望大陸公安會幫廉政公署去查保皇黨喺大陸嘅買票同種票」,質疑曾國衞有如「愛麗絲夢遊仙境」。

相關字詞﹕林鄭月娥 大灣區航空 曾國衞

上 / 下一篇新聞