港聞

港聞二

【Emily】立會議員打流感針 馬逢國露肩搶晒fo

【明報專訊】政府開始推行新一輪流感針注射,噚日由食衛局長陳肇始率領醫護去立法會幫議員接種。韓國近期有幾十宗打針後死亡個案,部分涉及藥廠賽諾菲(Sanofi)嘅針,但仍待查證原因。有議員話噚日打針時,陳姑娘無講流感針來源,但有議員攞到「針紙」紀錄,佢哋打嘅係「Vaxigrip Tetra」,即係賽諾菲產品。民建聯柯創盛講笑話,政府可能想搵佢哋做「白老鼠」,打完無事大家就可安心打針,又話自己唔驚,「生死有命」。

「針紙」顯示為賽諾菲產品

柯創盛笑言做「白老鼠」

噚日有37個議員打針。經民聯林健鋒捲起衫袖,豎起拇指話唔痛,仲呼籲大家都打針預防流感,又話陳姑娘無同佢講流感針係邊間藥廠。體育、演藝、文化及出版界馬逢國最誇張,打針時除衫鈕露半膊成為焦點,佢話噚日唔記得咗要打針,否則會著件短袖恤衫,結果著嘅衫窄得滯,捲唔起衫袖。佢同Emily講解緊情况時,路過嘅民建聯陳克勤都笑馬議員露肩好搶眼。

柯創盛打針之餘乘機向陳姑娘遞信,話市面流感針供應緊張,希望政府穩定供應,等更多市民能夠接種。港府及藥廠重申,香港用嘅賽諾菲疫苗同韓國採用嘅唔同批次,醫學會傳染病顧問委員會聯席主席曾祈殷就話,港府今季為各個疫苗計劃購置87萬劑流感疫苗中,62萬劑係賽諾菲。

相關字詞﹕馬逢國 賽諾菲製藥 流感疫苗

上 / 下一篇新聞