港聞

港聞二

【Emily】民主黨去英領館 提降BNO移民費 話言行無違國安法

【明報專訊】英國政府日前公布畀300萬合資格申請英國國民(海外)護照(BNO)嘅港人移居英國嘅安排。民主黨國際事務委員會成員噚日去英國駐港總領事館,同領事人員討論事件,向英方提出降低移民當地嘅財政要求門檻。

國際事務委員會主席劉慧卿、成員袁海文及梁翊婷等5人,噚日同英領館領事(政治及傳訊部主管)Jonathan Daniel Williams傾咗約一個鐘,主要談及BNO移民安排。按英方早前公布,移民計劃明年1月31日起接受申請,5年期簽證申請費用為每人250英鎊(約2358港元),兩年半期限簽證申請費用為每人180英鎊(約1827港元),申請人財政上要備有最少6個月在英國生活嘅費用。

袁海文:唔會自我審查

袁海文話,希望英方可降低簽證費用,又期望英方盡量降低備用生活費要求,因為年輕申請人財政能力有限。袁又話,據佢哋所知,如果家庭中嘅夫婦同為BNO持有人,可以其中一方先帶仔女去英國,佢話安排可方便夫婦其中一方留港打工,先安排家人移民。佢相信英國政府明年初會再公布更具體嘅說明條款。

《港區國安法》下,政界人士去見外國領事都易成為話題,但袁海文話佢哋係正常交往,言行亦無違國安法,所以唔會自我審查、自製寒蟬效應。

相關字詞﹕英國駐港總領事館 袁海文 劉慧卿

上 / 下一篇新聞