港聞

港聞二

【Emily】范國威探望:快必好精神 瘦咗少少

【明報專訊】人民力量副主席譚得志(快必)被控發表煽動文字等罪被拒保釋,還押荔枝角收押所。快必一直都有唔少親友探望,噚日就有西貢區議員、新民主同盟范國威(Gary)趁假期去探佢。Gary話快必好精神,只係瘦咗少少,但頭髮長咗未有得再剪,腳甲都好長,不過𠵱家已經有新指甲鉗用,腳甲已修剪妥當。

Gary話佢以前通常係公務探訪囚友,首次見識公眾探訪嗰種汗流浹背嘅場景,加上噚日假期,收押所人山人海,佢等咗個半鐘先見到快必,但探訪時間得15分鐘,話咁快用完,佢要用超乎平常嘅速度講嘢。

快必fb專頁都有透露其狀况,指快必話還押咗個幾月剪過一次頭髮,未能夠再剪;而收押所現有近1700名囚友,為咗方便管理,要佢上午就做晒要做嘅嘢,之後獨留囚室,無得自由活動。快必話Gary好有心,知道佢有坐骨神經痛,話佢一出嚟會有好醫師介紹,仲話Gary臨走時有啲眼濕濕,好唔捨得佢咁;快必又話政府不停以拘捕、控告嚟對付抗爭者,不止令法院超負荷,懲教署壓力都會好大。

相關字詞﹕范國威 譚得志 快必

上 / 下一篇新聞