港聞

港聞二

【Emily】#save12hkyouths 阿廷碧雲完成鄒家成挑戰

【明報專訊】12港人被指涉潛逃台灣,扣留內地至今近兩個月,近日社交媒體出現一項挑戰,接受挑戰者要上載同「#save12hkyouths」呢句話嘅合照,然後標註另外3人完成挑戰。Emily發現,早前就議員延任問題同民主派隔空激辯嘅抗爭派鄒家成,喺fb標註咗公民黨楊岳橋、民主黨林卓廷同黃碧雲,其後林卓廷同黃碧雲先後完成挑戰,有網民喺鄒家成個post下面留言,話「林卓廷block左(咗)你」;其後林卓廷留言話「我做左(咗)(個挑戰)啦」。

寫#save12hkyouths自拍上載

今次行動由「香港監察」創辦人羅傑斯(Benedict Rogers)發起,希望呼籲國際社會關注12港人,接受挑戰者包括「環保少女」通貝里(Greta Thunberg)、藝術家巴丟草等。

通貝里巴丟草接受挑戰

早前討論立法會議員延任與否問題時,黃碧雲一度話如果撤出議會,就無法用議員身分幫助家屬,佢其後道歉同收回言論,鄒家成其時就反問黃碧雲「請問鄒家成有冇議席?」鄒家成又試過就議員去留問題,喺網台節目同林卓廷舌劍唇槍。

另外,中西區區議員黃永志近日喺選區內嘅西區警署對開,掛起寫有「香港,仲差十二個人」嘅橫額,佢話希望大家保持對12港人嘅關注。

相關字詞﹕12港人 黃碧雲 林卓廷 立法會議員 民主黨

上 / 下一篇新聞