港聞

港聞二

【Emily】同邱騰華開視像會 網民讚星部長貼地

【明報專訊】商務及經濟發展局前日公布同新加坡達成「航空旅遊氣泡」原則協議,港人喺滿足相關防疫條件後,就可以免檢疫去新加坡。新加坡交通部長王乙康前日喺facebook上載佢同商經局長邱騰華開視像會議嘅相,有網民留意到王乙康用辦公室常見嘅一疊疊A4紙墊高電腦(圖),方便開會時遷就電腦鏡頭嘅角度,有網民讚佢咁做夠晒「貼地」。

用兩疊A4紙墊高電腦就啱位

新加坡交通部長王乙康上載開會相後,佢辦公室嘅A4紙意外成為網民焦點,事關有眼利嘅網民留意到佢開視像會議時,用咗兩疊A4紙墊高部手提電腦,方便佢望住熒幕。有網民話佢唔嘥錢買電腦支架,憑呢點睇得出佢係「貼地」部長。有網民又講笑問王乙康,萬一辦公室無晒A4紙,佢又會點樣發揮創意、用咩嘢墊高電腦呢?

王乙康喺帖文提到,開會時邱騰華好快就留意到自己背後嘅碼頭景色,邱騰華亦都即刻調整電腦鏡頭角度,等佢可以隔空欣賞香港維多利亞港嘅風景。邱騰華仲藉住呢點,同王乙康講「香港同新加坡有好多方面都相似」。

相關字詞﹕新冠病毒 旅遊氣泡 新加坡 邱騰華

上 / 下一篇新聞