港聞

港聞二

【Emily】完成檢疫出番嚟 王婆婆心情矛盾

【明報專訊】過去經常舉英國旗同黃傘參與示威、人稱王婆婆嘅王鳳瑤,上年喺內地被捕後,經歷咗「取保候審」嘅一年。佢10月2日返港,之後去曹公潭戶外康樂中心接受14日檢疫,噚日完成檢疫出番嚟,立法會議員張超雄同前議員朱凱廸去咗接佢。王婆婆話感到開心,但內心好矛盾,百感交集,「因為好掛住嗰12位手足,佢哋一定比我更加慘㗎!」她見傳媒時話覺得攰,需要休息,今日上晝會見記者詳細交代過去一年嘅經歷。

王婆婆噚日檢疫完出嚟後,同張超雄、朱凱廸擁抱,多謝佢哋。王婆婆表現激動,接連話「好開心」,講笑話「我老咗好多,你哋仲認得我嘅?」佢又話自己支英國旗已經唔見咗,張超雄就安慰話:「唔緊要,再買過啦。」

王婆婆上年8月返深圳居所,喺皇崗過關時被內地人員以「尋釁滋事罪」拘捕,之後被羈押喺唔同嘅看守所,至上年9月29日獲釋,但仍被扣起證件,須接受為期一年嘅「取保候審」。

相關字詞﹕取保候審 王鳳瑤 王婆婆

上 / 下一篇新聞