港聞

港聞二

【Emily】與威廉王子「同場」開talk 清潔龍教人類:要同環境好好拍拖

【明報專訊】氣候變化近年全球關注,天文台前台長岑智明、「清潔龍阿德」同英國劍橋公爵威廉王子噚日喺「TEDxTongChongSt」嘅facebook live演講,呼籲大家保護環境。其中阿德仲大爆情史:「我到𠵱家都未同人拍過拖,但一直覺得我係同環境拍緊拖」,話人類未能停止氣候變化嘅原因,正係因為缺乏對大自然嘅尊重。唔少網民留言同阿德打招呼,又大讚佢講得好。

阿德喺片中話,好多人熱愛大自然,見到美景會感歎,「但愛佢(環境)嘅同時,我哋一路都冇好好咁尊重過佢」。阿德話人類一直同環境談緊一場數萬年嘅戀愛,「人類好依靠環境,環境亦因為有人類而生色不少」,但人類習以為常咁認為,大自然嘅付出係應該嘅,「我哋應該同環境講聲對唔住:我哋一直冇好好尊重、珍惜你,咁樣拍拖係唔啱㗎」。阿德呼籲大家坐言起行,時刻諗吓自己嘅行為對環境有咩影響,「否則環境呢個愛人,就會離我哋而去」。

威廉王子就話,相對幾百、幾千歲嘅樹木,我哋呢一代只佔歷史長河中好短嘅時光,但我哋卻有能力確保其他生命繼續存活另一個幾千年,呼籲大衆保護環境,仲話我哋別無選擇,唯有成功一途。

相關字詞﹕環境保護 清潔龍阿德 氣候變化

上 / 下一篇新聞