港聞

港聞二

【Emily】民間氣象預測:今個冬天有點冷

【明報專訊】氣候暖化,2019年香港天文台只錄得1日寒冷天氣(12℃或以下)。香港民間氣象組織「MET WARN天氣預警」前晚喺facebook發帖話拉尼娜(La Nina)已形成,並繼續增強。該組織話根據紀錄,出現拉尼娜嘅年份,本港冬季平均氣溫會較正常低,本港近年雖受城市化影響,冬季平均氣溫呈升勢,將拉尼娜嘅因素考慮在內之後,預計今年冬季平均氣溫會較去年低,個別日子有機會低於10℃。唔少網民留言話希望迎來真正嘅冬天。

天文台回覆Emily查詢時話,過去個幾月,赤道太平洋中部及東部嘅水溫持續下降,料趨勢持續,顯示拉尼娜現象好有可能開始發展;又話統計分析顯示,當拉尼娜發生時,香港冬季氣溫出現正常至偏低嘅機率一般會較高。

天文台曾經話,拉尼娜與厄爾尼諾(El Nino)現象會交替發生,兩種現象分別指赤道太平洋中部同東部表面海水異常寒冷或溫暖,繼而影響世界各地大氣環流及氣候。翻查天文台紀錄,1950至2015年有拉尼娜現象嘅冬季(12至2月),平均氣溫16.2℃,較正常低0.7℃。不過2016年1月下旬本港出現異常寒冷天氣,大帽山頂結霜,就同拉尼娜無關。

相關字詞﹕拉尼娜

上 / 下一篇新聞