港聞

港聞二

【Emily】葉劉麥美娟 華峰分不清 鄺神係邊個 恒鑌話唔識

【明報專訊】民主黨鄺俊宇「鄺神」之名深入民心,不過原來有建制派唔識呢個名。話說噚日立法會交通事務委員會選主席期間,民主黨許智峯話要提名「鄺神」,主持會議嘅民建聯陳恒鑌就問「邊個叫鄺神?我唔識喎」。香港本土毛孟靜就大笑:「鄺神你都唔識?」阿峯就話係講緊鄺俊宇,指陳恒鑌「有啲無知」。

噚日立法會9個事務委員會選舉正副主席,都有唔少趣事發生。話說經民聯林健鋒獲提名做財經事務委員會主席,新民黨葉劉淑儀和議,主持會議嘅金融服務界張華峰(肥老闆)一度嗌錯葉太做「麥美娟」,唔少人即大笑。去年肥老闆透露工聯會麥美娟用粗口鬧特首林鄭月娥,當時佢只係稱呼美娟做「嗰個女仔」,睇嚟肥老闆終於記得麥美娟個名喇。

此外,衛生事務委員會主席由醫學界陳沛然對撼民建聯葛珮帆,資訊科技界上載票數圖片話係「Doctor vs doctor」,即係「醫生vs.博士」,最終由「博士」葛珮帆當選。

相關字詞﹕鄺俊宇 葛珮帆 許智峯 建制派 反修例 葉劉淑儀 反修例風波 林鄭月娥

上 / 下一篇新聞