港聞

港聞二

【Emily】Panel今明爭櫈仔 建制決全攬正副主席

【明報專訊】立法會18個事務委員會今明兩日開會選舉正副主席,建制派決意包攬所有委員會嘅正副主席,連上年兩陣營協調後畀民主黨鄺俊宇同社福界邵家臻做正副主席嘅福利事務委員會都要壟斷,改由民建聯蔣麗芸同旅遊界姚思榮擔任。有民主派議員同Emily講,相信泛民同事唔會畀建制派咁容易選到,但未必每個委員會都要拖延,有啲民生攸關、港人關心嘅就想盡快開會。

邵家臻:沒諗過拖 盼逼政府做嘢

現時只有邵家臻一個民主派做緊委員會副主席,可以主持主席選舉。佢同Emily講冇諗過要好似內會選主席咁,拖到選唔到,「反而我覺得好多福利議題都好緊張,希望叫多啲官員上會,逼政府做嘢」。

蔣麗芸勢任福利委會主席

蔣麗芸話,自己出選福利事務委員會主席係建制派「大家嘅決定」,佢自己無咩所謂。不過,佢話福利事務好多人關心,唔係好政治性,𠵱家泛民同政府無偈傾咁,佢做主席嘅話可幫手向政府提出值得做嘅政策。

民主黨尹兆堅及胡志偉、街工梁耀忠今日要就今年六四涉煽惑他人參與未經批准集結、明知而參與未經批准集結嘅案件上庭,未必可以開到會。有泛民就話再少幾個人,想拖延選主席更添難度。

上 / 下一篇新聞