港聞

港聞二

【Emily】田北辰扮麻煩乘客 要司機勸扣安全帶

【明報專訊】實政圓桌田北辰(MT)2015年已要求政府喺小巴裝安全帶感應器,佢噚日喺facebook出帖介紹,話運輸署9月底陸續喺8條專線小巴線試裝感應器,車上有顯示屏睇到各乘客有冇扣好安全帶。佢搵埋莊豪鋒等黨友實測,仲扮演「超級麻煩乘客」,要司機不停勸佢先肯扣安全帶。

MT同黨友上演小劇場,其他人乖乖扣好安全帶後,車上得番MT唔聽司機勸告,仲話自己只係坐一個站,以前都唔使扣安全帶。司機好言相勸話係法例規定,MT最後乖乖扣上。

MT認為,顯示屏可以令司機對乘客有無扣安全帶嘅認知度提升,乘客上車都會自動自覺扣好。不過佢同黨友一齊跟車,睇吓真實乘客反應後,就形容有啲氣餒同失望,因為有一半人唔睬司機,司機敦促咗幾次之後都要開車。MT話要有埋發聲感應器,無扣好安全帶,感應器就響,間接逼乘客一定要扣好,又話運輸署都認同要試一試。

唔希望要用發聲感應器逼扣帶

MT話希望唔使去到最後方案,即係乘客唔扣好安全帶就唔開車,擔心會引起好多衝突。

相關字詞﹕小巴 田北辰

上 / 下一篇新聞