港聞

港聞二

【Emily】打風假變WFH 沈豪傑:力場巨大咗

【明報專訊】熱帶風暴「浪卡」令香港噚日掛起8號風球,係近年少見日間全日都掛風球,令部分打工仔多咗日「風假」,學校亦停課。每次有風暴逼近,網民都笑言會有「力場」令大家最後都要返工,元朗區議員沈豪傑噚日就喺facebook笑談今次打風,話「力場」仍然存在。

Zoom開會上堂 沈:李生有投資

沈豪傑話,傳說香港存在「李氏力場」,當颱風接近香港時就會被推走,大家第二朝照常返工返學,無假期,噚日大家都話莫非力場消失咗?佢話因為疫情,大家習慣咗在家工作,用Zoom視像開會等,所以噚日大家都如常在家工作同上堂,足見李氏力場仲存在:「點解?因為李生(長和系創辦人李嘉誠)是Zoom的投資者之一啊,力牆(場)只是轉化成另一種更巨大的能量而已」。

另外,過往每次打風,唔少區議員都會落區視察有無塌樹等問題,噚日風勢雨勢唔算好大,公民黨沙田區議員黃文萱見無咩風雨,辦事處就如常開工,下晝又喺facebook出post報告區內超市食物供應充足等。

相關字詞﹕8號風球 打風 沈豪傑 李氏力場

上 / 下一篇新聞