港聞

港聞二

【Emily】陳凱欣煮龍蝦 何俊賢笑城市妹未夠經驗

【明報專訊】立法會前議員陳凱欣、民建聯漁農界議員何俊賢除咗平日講吓政府政策外,仲傾吓下廚樂,不過何俊賢就笑陳凱欣「城市妹」煮海鮮未夠經驗。話說陳凱欣喺屋企煮龍蝦後喺facebook同網民分享(圖),佢話用咗芝士同少少鹽,將龍蝦放入氣炸鍋煮20分鐘;阿欣話呢味餸冇乜難度,鼓勵大家多啲留喺屋企開餐、減少外出聚會,以減低染疫風險。

何俊賢隨即留言分享,包括post咗蟹嘅相話白焯或蒸「才是王道」;並post咗買魚嘅相分享煮法,又要落辣椒又要落酒同葱芹,佢笑阿欣「你啲城市妹仲未夠經驗」。阿欣就回覆話自己城市妹,唔及何俊賢漁農界,叫對方快啲煮畀佢食,又話要搵次一齊煮畀街坊品嘗,睇吓大家技術;何俊賢就笑佢「你打贏我個書僮先啦」。

何俊賢噚日仲特意出post,笑阿欣用芝士煮龍蝦「實在太未能發揮其價值」,又同大家講𠵱家海鮮平,「如經濟許可可多吃」。網民留言叫佢顧及自己身體有幾多quota,何俊賢就話「乜都唔食仲快謝」。被問到會否考慮幫業界推廣本地食材同本土特色美食,佢就話市區人買海鮮或多或少覺得被呃秤,建議搞番個「足秤商標」商舖咁話。

相關字詞﹕龍蝦 海鮮 漁農界 何俊賢 陳凱欣

上 / 下一篇新聞