港聞

港聞二

【Emily】民政專員話不符職能 區議員提商港康碼 泛民唔得建制無事

【明報專訊】今屆區議會唔少議題被指不符區議會職能,但準則如何判斷受質疑。九龍城區議員李軒朗噚日上載該區民政事務專員信件,指有5份民主派提出嘅文件內容不符區議會職能,包括「反對港康碼」,佢質疑,建制派提出討論《施政報告》,亦有提健康碼等政策,又被視為符合討論範圍;李軒朗同Emily講,民政專員做嘢應該一致啲,𠵱家係「擺明車馬話畀人聽出cheat」。

專員信中指泛民提出嘅區議會文件,包括討論通識科、協助12港人、要求制訂《動物保護法》、要求教育局撤回取消教師註冊決定、反對「港康碼」,都不符合《區議會條例》中嘅區議會職能,要求區會主席蕭亮聲慎重審視,否則政府部門人員唔會出席及參與討論。

不過,Emily獲得當區建制派提交對施政報告期望嘅文件,當中提及要盡快推「港康碼」,以至要求政府設「失業援助金」、要求政府派錢等;民政專員就未有話不符《區議會條例》。

14九龍城區議員聯署

促剔除鄧炳強到訪議程

此外,14名九龍城區議員聯署,話獲悉警務處長鄧炳強將列席區議會會議,批評佢到訪其他區議會時不斷重複既有論調,拒絕聆聽、回應區議員質詢,稱拒絕浪費時間配合鄧炳強上演「政治樣板戲」,促請主席剔除有關議程。

相關字詞﹕九龍城 警務處長 健康碼 鄧炳強 區議員 區議會 施政報告

上 / 下一篇新聞