港聞

港聞二

【Emily】星光大道噴泉匯演 最快周三試演

【明報專訊】尖沙嘴星光大道原來仲有新搞作未推出,受舊年社會運動同今年疫情影響,佢嘅水上音樂噴泉匯演「Water of Stars」遲遲未有機會面世,嚟緊最快今個星期三、四開始試演,噴泉水柱會隨住管弦樂團演奏嘅當代音樂跳動,再配合五彩燈光效果;每節表演約3至5分鐘。

音樂噴泉有20米乘14米咁大,中間有蓄水池,可以儲存大量淡水;佢亦有雨水收集設施,收集嘅雨水可以循環用喺音樂噴泉,而甲板亦裝有太陽能電板及LED顯示屏,達至環保效果。

管理公司:為疫後旅遊業做準備

星光大道管理有限公司發言人話,音樂噴泉係星光大道優化計劃一部分,為疫後旅遊業復蘇做準備。今次開支由該公司負責,唔使用公帑,但花幾多錢就唔方便透露。音樂噴泉將每日定時公演,場次會配合幻彩詠香江,詳細公演時間表稍後公布。不過,疫情下人群聚集有風險,如果好多人聚埋一齊睇,公司發言人話會勸喻市民保持社交距離。

相關字詞﹕星光大道

上 / 下一篇新聞