港聞

港聞二

【Emily】入學6年 歷坐監停學 收押所應試 黃之鋒公大畢業

【明報專訊】前香港眾志秘書長黃之鋒終於喺公開大學畢業了!之鋒噚日喺facebook公布消息,話校方確認佢已經完成社會科學學士(政治及公共行政)課程,並以乙等(一級)(Second Class Honours (Upper Divison))成績畢業。之鋒話從2014年入學至今,可以講係歷盡波折,佢曾經因為被判坐監而停學,亦試過喺荔枝角收押所裏應試。至於日後有咩打算,之鋒就話選擇更加專注咁投入公共事務。

感激校方沒施壓 面對訴訟難規劃人生

由2014年讀到𠵱家,之鋒話過去成日講笑「雨傘(運動)幾多年我就讀咗幾多年」,終於順利畢業,總算完成一個心願。佢感激教過佢嘅教授、老師、同學對佢嘅體諒,「於我在學期間,校方從來沒向我施壓,也得來不易」。對好多人嚟講,大學畢業可能係步入人生下一個階段嘅轉捩點,不過之鋒覺得自己唔太可以有人生規劃,因為前路已受官司訴訟同政治風暴所限。

唔少政界人士都留言恭賀之鋒畢業,台灣「太陽花」學運領袖陳為廷亦替之鋒高興,佢話上年香港朋友就「反送中」抗爭籌備遊行,但當時黃之鋒正喺獄中預備最後一場考試,佢話當時聽完朋友講都笑出嚟,但其實都幾難過,唔知道喺獄中預備考試係咩光景,又指呢幾年唔知幾多香港「手足」要放棄學業流亡,覺得台灣人可以讀到想讀嘅書係非常幸運。

相關字詞﹕雨傘運動 公開大學 黃之鋒

上 / 下一篇新聞