港聞

港聞二

【Emily】場地重開 葉劉歎粵劇同汪阿姐合照

【明報專訊】疫情令唔少演出場地關閉咗一段時間,康文署場地近日先有限度開放,新民黨主席葉劉淑儀日前就去咗屯門大會堂睇《傳統粵劇例戲及排場折子戲展演》,並喺facebook分享行程,除咗睇粵劇,葉太話當日喺好友兼戲曲專家譚榮邦同八和會館工作人員引領下,有幸參觀「品」字形後台,又同一眾年輕演員交流,佢更同八和會館主席汪明荃合照。

葉太話演出開始前,汪明荃上台演講,除慰問一眾「餓戲」已久嘅粵劇迷,更希望往後可以喺全港18區巡迴演出,佢透露汪阿姐正籌備八和會館YouTube頻道,據知暫時會製作大約100條短片,主要係介紹粵劇歷史同各種粵劇功架等。葉太話其實識咗汪阿姐幾十年,一直好敬佩對方敬業樂業精神。

4星酒店住一晚 同夜歸護士傾偈

本身住港島嘅葉太話,當晚睇完表演都好夜,佢訂咗屯門大會堂附近一間4星酒店住一晚,喺酒店同一班夜歸女士傾偈,先知佢哋係屯門醫院護士,由醫管局安排住酒店以便佢哋輪更返工。葉太話,如果大家喺街見到佢,都不妨上前同佢傾偈。

相關字詞﹕八和會館 粵劇 汪明荃 葉劉淑儀

上 / 下一篇新聞