港聞

港聞二

【Emily】聶德權澄清:唔係話公僕違誓即涉推翻政府

【明報專訊】公務員事務局長聶德權前日喺電台節目講解公務員宣誓安排,提到違反誓言係好嚴重嘅事,多間傳媒將佢嘅言論理解為如果公務員違反誓言,可能有推翻現屆政府意圖。事隔一日,聶德權噚日喺fb澄清,話自己係指如果唔接受一國兩制、唔承認香港係中國一部分、甚至認為要推翻中央同特區,就係違反誓言,「而非一些報導所指,違反誓言或有推翻政府的意圖」。

聶德權上周六嘅講法係,違反誓言係好嚴重嘅事,反問如果話唔擁護基本法、唔效忠特區,「意思係咪你唔支持一國兩制?甚至你對香港作為國家嘅一部分都唔認同?或者做一啲完全唔接受呢個政府、想推翻現有政府嘅意圖?係咁嘅層面」。

聶德權喺fb post又話公務員係政府骨幹,喺政策醞釀、修訂過程中可積極參與、表達看法;但當政府有決定,公務員就要尊重機制、做好解釋,個人想法或政治理念唔應該影響工作,亦唔應該公開表達不滿或唱反調。

港台工會:公務員職責係服務市民

香港電台節目製作人員工會回覆,話公務員職責係服務市民,「兼聽則明,偏聽則暗」,如果將唔同意見視為「唱反調」,會妨礙政府推行政策時自我修正嘅能力。

相關字詞﹕公務員宣誓 宣誓 公務員事務局 聶德權 公務員 一國兩制

上 / 下一篇新聞