港聞

港聞二

【Emily】曾鈺成:林鄭話民記幫唔到政府培育人才 上任之初 話明唔滿意劉江華蘇錦樑兩局長

【明報專訊】民建聯創黨主席、立法會前主席曾鈺成喺港台節目《鏗鏘說》爆料,話特首林鄭月娥2017年上任之初,曾經「好唔客氣」咁向佢指出,民建聯多年來未能為政府培育人才;當時有兩個民建聯成員做局長(時任民政事務局長劉江華、商經局長蘇錦樑),林太表明對兩人都唔滿意!

林太話炒晒兩人令民記好難過

「姑且留番一個」

曾鈺成引述林太話,如果將兩個局長「炒晒」,會令民建聯好難過,所以「姑且留番一個」。翻查資料,林太2017年上任時嘅班子,局長中只有劉江華係民建聯成員,到咗今年4月班子再換人,劉江華亦離任。

「個位唔係幾好」 拒CY副司長之邀

曾鈺成喺節目話,佢當時回應話民建聯從來唔認為有使命要為特區政府培養管治人才,「我哋嘅任務,就係去打選戰」,以贏取足夠議席,支持政府依法施政,邊個做特首唔關佢哋事。曾鈺成更加同林太講:「(民建聯)梗係冇人入嚟政府,叻啲嘅人我會搵佢選舉。」

曾鈺成又提到,前特首董建華、曾蔭權同梁振英都有邀請佢加入政府,梁振英仲提出「副司長」一職,不過曾鈺成拒絕咗,因為覺得「個位唔係幾好」。

有人話如果曾鈺成做特首,香港今日就唔會「咁慘」,曾鈺成話雖然同建制、泛民都有溝通,但兩邊都唔會真正信任佢。佢又爆料話,新民黨葉劉淑儀若干年前同佢講,話全個建制派裏面,只有佢兩個可以做特首,但又話曾鈺成無喺政府工作嘅經驗。

上 / 下一篇新聞