港聞

港聞二

【Emily】街頭現「賀雙十國慶」橫額 人代陳曼琪籲舉報

【明報專訊】聽日係台灣雙十節,近日香港街頭出現「慶祝雙十國慶 中華民國萬歲」橫額,旁有青天白日滿地紅旗,港區人大代表陳曼琪就喺facebook出帖話「見到要立即舉報!!」。

另外據Emily所知,起碼3場慶祝雙十節嘅聚餐近日都被迫取消,主辦方質疑係咪同《港區國安法》有關,但有主辦酒樓就話係考慮到疫情嚴峻,所以取消。

至少3場聚餐被取消

主辦方質疑關國安法

元朗區議會副主席麥業成就雙十節準備3場聚餐,4人一枱,佢話位於旺角嘅倫敦大酒樓曾話展示板唔可以用「雙十」字眼,即使改為「辛亥革命」都仍然被拒辦聚餐;此外收到元朗「嘉嘉好宴會廳」通知必須取消聚餐,懷疑受政治施壓,佢引述場地負責人指辛亥革命字眼或涉國安法問題。

Emily打過畀嘉嘉好宴會廳,對方確認聚餐取消,但話唔知原因;倫敦大酒樓副總經理蘇萬誠就話,疫情現時嚴峻,最緊要唔好影響他人身體。被問係咪講過唔好用「雙十」字眼,蘇話通常都係用「辛亥革命」,又強調唔會諗國安法問題。

相關字詞﹕雙十節 元朗 區議會 疫情

上 / 下一篇新聞