港聞

港聞二

【Emily】民記投訴少女漫畫廣告暴露 畫家稱已過淫審處 「咩人諗咩嘢」

【明報專訊】深水埗西九龍中心近月同漫畫家林祥焜合作,喺外牆掛出多幅漫畫少女廣告,漫畫少女分別有泳衣、校服等造型,並配上「放肆」、「不忘初心」等字眼。民建聯劉佩玉、陳穎欣等噚日去請願,劉佩玉話唔少家長認為廣告人物衣著太暴露、姿勢不雅觀、子女睇到廣告後感到不安,亦擔心廣告發放信息為學生帶來不良影響;甚至話如果繼續懸掛,會發起網上聯署、去信淫審處要求檢視等。

多謝民記宣傳 林祥焜:曲線鬧政府

Emily問過林祥焜,佢話香港正經做嘢冇人理,所以要多謝民建聯令更多人關注佢,自言唔係首次收投訴,所以一直都將所有「見街」作品先送淫審處審批,𠵱家見到嘅版本係獲淫審處首肯,形容民建聯「曲線喺度鬧緊政府」。

林祥焜又話,好多後生女玩獨木舟、行山都著得性感又好健康,「係咪女性著到咁做運動就代表淫邪?咩人諗咩嘢」。佢唔驚日後商業合作因而受阻,因疫情下都冇乜人搵藝術家做嘢,「𠵱家多咗你(民建聯)幫我promote(宣傳),so good,效果反而好」,事件唔會影響佢畫漫畫嘅尺度。

油尖旺區議員林兆彬話,作為淫審處審裁委員小組成員之一,覺得廣告完全冇問題、非常健康;又話民建聯擔心意識不良、誤導,「𠵱家香港政府日日用謊言警暴治港,仲意識不良誤導啦!」

相關字詞﹕西九龍中心 漫畫 警暴 民建聯

上 / 下一篇新聞