港聞

港聞二

【Emily】陳德霖買商廈單位 消息:非做競選辦

【明報專訊】距離2022年特首選舉仲有年幾,近期傳出金管局前總裁陳德霖有意參選嘅風聲,雖然有接近陳德霖嘅消息人士澄清有關參選說法係子虛烏有,並無其事,但有迹象顯示陳德霖有新動作。

位處金鐘 千萬一炮過畀

土地註冊處資料顯示,由陳德霖及妻子陳唐芷菁持有嘅「冠盈(香港)有限公司」,今年5月以1080萬元購入位於灣仔軒尼詩道嘅金鐘商業大廈10樓A室同B室,且係「一炮過」畀錢,無做按揭,令人聯想會唔會同成立競選辦有關。不過Emily向接近陳德霖嘅消息人士查詢,佢話陳買呢兩個單位純屬自用,同所謂嘅參選無關。

相連單位加埋實用700呎

Emily去現場睇過,電梯大堂外嘅水牌顯示,大廈3樓係由行會成員湯家驊成立嘅「民主思路」總部,但就未有顯示10樓會設立啲咩公司。而10樓A室同B室兩個單位面積加埋約1000呎。消息人士話,金鐘商業大廈單位實用率大約六七成,如果計番實用面積,兩個單位加埋大約只有六七百呎,根本無可能做到競選辦公室咁話。

上 / 下一篇新聞