港聞

港聞二

【Emily】主持人鬼節執祭品煮餸夠噱頭 撞中大資訊日 湯家驊講座延期

【明報專訊】中大原定周六(10日)舉行講座,邀請行會成員、資深大律師湯家驊(Ronny)演講,題為「我的律師生涯、從政之路及年輕人職業發展的建議」;今次講座由早前喺盂蘭節期間執走路邊祭品煮食嘅中大政治及行政學系助理教授李薇做主持,呢個組合引起唔少討論,唔少中大學生都十分期待,亦有人喺facebook專頁「CUHK Secrets」上載咗Zoom會面嘅ID同密碼。不過Emily得悉,中大噚日發電郵畀學生,話因為講座同中大入學資訊日撞期,為咗確保有足夠IT、職員支援講座,所以決定延期咁話,原本有意聽講座嘅學生要再等等喇。

湯收風話有人想搗亂

Emily噚日問過Ronny,佢未知道講座延期嘅消息,但就話有朋友好心同佢講,網上似乎有人話想搗亂,亦有人公開咗Zoom會面嘅ID同密碼,佢都唔太知點處理,但就此通知咗主辦單位。被問到同主持人李薇本身點識?Ronny就話可能見過佢,但話主要係認識李薇嘅同事,對方邀請佢去演講,通常如果佢時間上方便,都會應承咁話。

今年9月,李薇喺facebook一個政政系內嘅群組出帖,附有路邊祭品及將祭品煮成三餸一湯嘅相片(圖),並批評市民浪費食物,引起熱議。

相關字詞﹕大學生 中大 大學 湯家驊

上 / 下一篇新聞