港聞

港聞二

【Emily】獨眼老師楊子俊出書 《逆權教師》「提早30年面世」

【明報專訊】曾經任教拔萃女書院通識科嘅教師楊子俊喺上年6.12事件中眼睛受傷,右眼視力剩餘2.5%,佢近日推出新書《逆權教師》,記敘過去8年教書生涯。楊子俊喺書中重提6.12中槍、入院被捕一事,透露出院後曾經猶豫,會唔會繼續堅持示威,但佢最後認為即使要犧牲自己嘅教育事業,都想再「多撐一會」,因為佢覺得「欲為人師者,必先為人」。

另撰《香港通識2020》網上發售

楊子俊喺書中提到,以前成日諗要喺退休時寫一本《教育界血肉史》,「闊別自己的過去,也讓舊生們緬懷一番」;點知佢今年30歲,教書生涯已經告終,呢本《逆權教師》提早咗30年面世。佢話隨住自己喺社運嘅參與同傳媒曝光日增,的確會影響學校形象,所以佢覺得都要離職,叫大家唔使難過。

楊子俊話,自己從「教育建制之內,走到了制度以外」,又話「無論是以雞蛋、以鐵鎚、還是以我的拳頭,我都要繼續撼擊那面牆」。今年多本通識書內容遭刪改,楊子俊話自己冇發言批評、冇聯署譴責,反而埋頭苦幹喺開學前寫咗一本《香港通識2020》,會於網上發售,「這是我為自己選擇的戰爭」。

相關字詞﹕反修例運動 逆權教師 楊子俊

上 / 下一篇新聞