港聞

港聞二

【Emily】財庫局許正宇上任半年 剛向行會申報民記身分

【明報專訊】唔少人都知道,財經事務及庫務局長許正宇係民建聯成員,不過Emily噚日翻查行政會議成員個人利益登記冊,發現上任近半年嘅許正宇,喺今年9月28日先補充申報自己係民建聯成員。

局長新聞秘書向Emily解釋,因為許正宇上任時要填寫兩份利益申報表格,一份係問責官員利益申報,另一份係行會成員申報;前者有註明要填報政黨聯繫,後者就未有就此特別註明;申報後被行會嗰邊提醒,所以就要補充番申報喇。Emily睇番問責官員申報,許正宇今年7月申報時,的確有喺「與政黨的聯繫」一欄申報自己係民建聯成員。

許正宇去年當選民建聯中委,其後退出,但仍然保留民建聯成員身分。佢上任之初,被指因為民建聯背景及父親關係先成為局長,佢就形容香港係大熔爐,無論嚟自邊度,都係英雄莫問出處。佢上任局長後,都有返民建聯總部出席圓桌會議。

相關字詞﹕許正宇 財經事務及庫務局 民建聯

上 / 下一篇新聞