港聞

港聞二

【Emily】議員去警方活動 民協唔知情 江鳳儀:一直都有探訪長者

【明報專訊】民協噚日喺facebook發文,話近日收到消息,指民協成員、屯門區議員江鳳儀參與由警方舉辦嘅探訪長者活動;民協主席施德來同Emily講,已經提醒江鳳儀要加強政治敏感度,避免參與警方「粉飾太平」嘅活動。江鳳儀就回應話,當日活動房署亦有份舉辦,佢以「屯門長者力量聯會主席」身分出席,認為一啲人因為佢同警員合照而「斷章取義」,感到難過。

主席:已提醒要加強敏感度

民協話事前唔知道江鳳儀出席「耆樂警訊」活動,已要求佢交代活動詳情;民協又提醒各會員「參與警方活動務須慎重,並重申民協徹查警暴的一貫立場」。睇番民協提供嘅照片,江鳳儀同一眾警員合照,佢哋面前擺放咗啲「福袋」,活動橫額印住「屯門警區」。

民協主席施德來就話,江鳳儀當日出席中秋前探訪長者活動;圖中嘅「福袋」裝有月餅同防疫物資,福袋由警方提供。

江鳳儀同Emily講,以往十幾年都有探訪長者活動,關懷弱勢更係佢政綱之一,又話自己嘅政治立場無變,一直支持調查反修例運動期間有無警暴。

上 / 下一篇新聞