港聞

港聞二

【Emily】與政府商健康碼合作 華昇胡定旭:未傾到收費細節

【明報專訊】政務司長張建宗日前話,政府積極同內地及澳門商討用「健康碼」互相豁免14日強制檢疫。要申請到「健康碼」,其中一步就係要做病毒檢測,華昇診斷中心之前喺普及社區檢測(全民檢測)中負責樣本化驗,華昇董事長、醫管局前主席胡定旭噚日出席一間防疫用品店開幕儀式時提到,同政府商討緊喺推行「健康碼」上合作,不過就未傾到收費細節,又話政府亦會接觸其他大型檢測公司。

胡定旭早前講過,華昇提供嘅檢測服務,如果以三合一方式作混樣檢測,每日最多可以驗9萬個樣本;仲話如果政府日後要開關或推出「旅遊氣泡」,華昇可提供足夠檢測量。

防疫用品店開張 多猛人捧場

開喺名醫雲集嘅中環中建大廈嘅防疫用品店iCleanic噚日開幕,除咗胡定旭外,出席嘅仲有食衛局前局長高永文、商經局副局長陳百里等。對於市民想開關,恢復同鄰近地區來往,高永文話基礎係本地疫情要真正受控,即係要連續一段時間無本地確診個案。

上 / 下一篇新聞