港聞

港聞二

【Emily】準備轉型 近期申報任大灣區顧問 劉國勳:因延任推走唔少工作

【明報專訊】立法會選舉延期一年,唔少本身唔再尋求連任嘅議員,計劃都被打亂。Emily翻查立法會議員個人利益登記冊,發現原本無再參選嘅民建聯劉國勳(圓圖),上月初先後申報擔任「創壹顧問有限公司董事」、「中國路橋(香港)有限公司大灣區事務顧問」。

劉國勳同Emily講,本身都有準備轉型,自言對公共事務、交通、城市土地規劃議題較熟悉,希望做一啲公共事務及顧問工作,加上大灣區都係好大嘅市場。面對立法會延任一年,佢話本身唔少大企業都搵佢工作,但因為延任而推咗好多,只係做一啲時間上可以兼顧嘅工作,又強調即使轉型,佢都會繼續兼顧政策研究。

水牌被除 慢必:新一頁新工作

民建聯蔣麗芸早前亦決定唔競逐連任,佢上月底就申報咗「新世代培育基金有限公司董事」職務,話係非受薪,公司性質係非牟利機構。

至於決定唔接受延任嘅人民力量陳志全(慢必),噚日就喺facebook出post,影低佢喺立法會辦事處樓層外嘅名牌已被除去,自言「揭開新的一頁,投入新的工作」,叫香港人加油。睇番立法會網頁「議員履歷」部分,已經再冇顯示慢必、朱凱廸、公民黨陳淑莊3人嘅履歷同通訊資料喇。

相關字詞﹕立法會延任 立法會選舉 立法會議員 大灣區

上 / 下一篇新聞