港聞

港聞二

【Emily】CY話有官員當習總說話耳邊風

【明報專訊】全國政協副主席、前特首梁振英(CY)近日多番喺facebook批評教育局長楊潤雄冇公開被譴責、警告嘅教師同涉事學校名稱,早前甚至入稟司法覆核。CY噚日再發炮,除咗形容教協係「陀地工會」,話「教協不倒大亂不止」,更引述國家主席習近平3年前喺香港講過「為官避事平生恥」,不點名話「有些官員當耳邊風」。

形容教協係「陀地工會」

CY出post講何謂「為官避事」,佢用「左手紋青龍,右手紋白虎」嘅司機喺雙黃線路邊上落客貨為比喻,話交通督導員巡邏時見到,知道司機太惡、可能有「陀地」包庇,就唔想惹事、轉入橫街。CY叫教育局官員「拿出點擔當」,仲一連用幾個hashtag,叫教育局「不要怕雙手紋青龍白虎的老師」、「不要怕教協這個陀地工會」、「不能讓教協藉着收保護費繼續壯大」、「教協不倒大亂不止」。

葉建源叫倒盆水照吓自己個樣

教育界議員、教協副主席葉建源話CY又告人、不斷撩是鬥非、一日出幾個post鬧人,「應該倒盤(盆)水照吓自己個樣,邊個先係惡?」佢強調教協成立近50年,「一直係講道理,唔係靠惡,亦冇乜可以惡」,批評CY說法挑釁、抹黑,又話大家一直知CY係有權用盡,教協會繼續做好本分。

相關字詞﹕為官避事平生恥 教協 葉建源 楊潤雄 梁振英 司法覆核 習近平 教育局

上 / 下一篇新聞