港聞

港聞二

【Emily】福利事務委會 田二少拒坐鄺神主席位

【明報專訊】立法會延任一年,各委員會正副主席又會執位,建制派已計劃包攬全部委員會正副主席職位,有啲位有人爭,有啲位就有人耍手擰頭唔想做。實政圓桌田北辰原「被分配」做福利事務委員會主席,呢個位原本係民主黨鄺俊宇做,不過田二少就拒絕參加搶位,話唔想兩面唔討好。

建制計劃包攬全部委會正副主席

田二少同Emily講,佢𠵱家走中間理性路線,衡量過如果做委員會正副主席,開會時會成為建制及民主派兩派磨心,做任何裁決都會好煩,咁不如自由啲咁過呢一年。對於建制派一個位都唔讓畀民主派,田二少話之前民主派選主席時拖延,搞到兩派關係都好差,故兩派都有責任。

新一年度委員會職位大兜亂,教育事務委員會主席料由經民聯梁美芬擔任,近期成日批評司法機構嘅民建聯周浩鼎,有報道話或會出任司法及法律事務委員會主席。內會及財會就無變,分別由李慧琼同陳健波做主席。

上 / 下一篇新聞