港聞

港聞二

【Emily】沈祖堯:放棄年輕人等同放棄未來

【明報專訊】社會對年輕人參與反修例運動有唔同意見,美心集團創辦人伍沾德嘅長女伍淑清就曾講過「放棄年輕人」。中大前校長沈祖堯噚日喺電台節目話,香港年輕人有創意同活力,好唔同意要放棄佢哋,認為等於放棄自己未來,佢又呼籲社會多接納彼此意見。

讚年輕人有創意同活力

沈祖堯噚日喺商台《政好星期天》提到,𠵱家年輕人睇唔到希望,感到迷惘。唔少後生仔視置業為目標,但沈祖堯話佢哋唔應該只係諗買樓,唔好因為買唔到樓,就認為自己無前途、無生活。佢鼓勵年輕人到外國工作幾年吸收經驗,再返香港發展。

沈祖堯下年4月會加盟新加坡南洋理工大學醫學院,佢話太太仍然喺香港工作,母親亦年紀唔細,所以考慮係咪加盟嗰陣有困難。不過佢話南洋理工大學醫學院正在發展,而且新加坡政府放好多資源做有關長者健康嘅研究,佢亦想參與呢方面研究,所以決定隻身到新加坡工作。佢又話,香港同新加坡相似,希望日後可帶動兩地合作。

上 / 下一篇新聞