港聞

港聞二

【Emily】侵侵確診 克勤:可打消毒劑 李梓敬:民主能醫百病

【明報專訊】美國總統特朗普夫婦噚日確診新型冠狀病毒嘅消息公布,成為全球大新聞,香港政圈都唔少人熱議,好似新民黨李梓敬就對特朗普病情有咁嘅預測:「相信佢一定冇事,因為民主能醫百病。」民建聯嘅陳克勤就話事件不幸,但「幸運的是他可以親身一試自己建議的:將消毒劑注射入體內,以作治療」。克勤仲分享一張網上改圖,圖中特朗普拎住樽消毒藥水,揶揄佢今年4月曾經講過應該研究係咪可以通過向人體注射消毒劑(disinfectant)治療新冠病毒。

民建聯何俊賢推論呢個係選舉策略,評估特朗普選情勢危,唯一有獲勝機會好可能係「肉體消滅」對手民主黨參選人拜登。何俊賢嘅分析如下:拜登作為民主黨參選人保安必定嚴密,但畢竟特朗普都唔係一般人,諗到以自身染疫再借早前二人同場辯論機會埋身。

譚文豪藉機反駁「美製病毒」論

不過,公民黨譚文豪就喺facebook留言,認為特朗普中招可能會「拖累選情」,仲指出「紅媒成日話美國製造武漢肺炎」,質疑有邊個國家會整病毒整到國家元首中招、仲要冇解藥。公民黨主席梁家傑亦簡單分享咗特朗普染病嘅新聞連結,未有評論。

相關字詞﹕譚文豪 陳克勤 何俊賢 李梓敬 新型冠狀病毒肺炎 特朗普

上 / 下一篇新聞