港聞

港聞二

【Emily】歷武漢封城「戰時狀態」 馮浩賢離任稱無愧

【明報專訊】內地中新網前日率先報道,年初留守武漢支援滯留湖北港人嘅駐武漢辦主任馮浩賢3年任職期滿,即將離任,Emily噚日報道咗佢嘅接任人係郭偉勳。馮浩賢前晚喺facebook出帖話,前日係佢最後一日返工,形容今次經驗係「獨特之中嘅獨特」,因為武漢係新冠病毒疫情嘅「Ground Zero」 ,「封城」時咩規章制度喺呢種「戰時狀態」,統統不管用。佢要將30多年嘅工作經驗、智慧同人脈都拎出來,做得幾多得幾多、救得幾多得幾多,「即使最後未能盡如人意,但一定無愧於心」。

要用盡經驗智慧人脈救人

佢喺fb話,與同事道別後,會同一班喺武漢嘅港人朋友包括一啲疫後康復者聚一聚,「收拾細軟」後就會返港。任滿之時佢話不無感慨,但作為一個親身經歷者,見證到國家早期喺抗疫付出,今天獲得咗可觀嘅回報和效果,係欣慰嘅。佢又話,回港接受家居隔離後,會「出山」同各方好友見面,但就冇透露將會去咩崗位。噚日喺政府電話簿上,馮浩賢仲係駐武漢辦主任。

啱啱獲頒行政長官公共服務獎狀嘅佢預祝大家國慶中秋快樂,並上載一張有11粒提子、1個月餅和兩個橙嘅相,唔知係咪有特別意思?

上 / 下一篇新聞